ಇತ್ತೀಚೆಗೆ ಗೆಳೆಯರೊಂದಿಗೆ ಬೆಂಗಳೂರಿನ ಫೋರಂ ಮಾಲ್ ಗೆ ಹೋಗಿದ್ದೆ, ಕೆಲವು ಖಾಲಿ DVDಗಳನ್ನು ಕೊಳ್ಳಬೇಕಿತ್ತು, ನನ್ನ ಕಂಪ್ಯೂಟರ್ ನಲ್ಲಿನ ಮಾಹಿತಿಯನ್ನು ಬರೆದಿಟ್ಟುಕೊಳ್ಳಲು.

ಅಲ್ಲಿ, “ಮೋಸರ್ ಬೇರ್ ಕಂಪೆನಿಯ ೧೦ ಖಾಲಿ DVDಗಳನ್ನು ಕೊಡಿ” ಎಂದೆ. ಅದಕ್ಕೆ ಅಂಗಡಿಯವರು ”ಮೋಸರ್ ಬೇರ್ ಇಲ್ಲ ಸಾರ್, ಬೇರೆ ಕಂಪೆನಿ DVD ಇದೆ, ಕೊಡಲಾ?” ಎಂದರು. “ಬೇಡ” ಎಂದು ಹೇಳಿ ಬೇರೆ ಅಂಗಡಿಗೆ ತೆರಳಿ ಅಲ್ಲಿ ಮೋಸರ್ ಬೇರ್ DVD ಕೊಂಡುಕೊಂಡೆ.

ಇದನ್ನೆಲ್ಲ ನೋಡುತ್ತಿದ್ದ ನನ್ನ ಗೆಳೆಯರು, “ಯಾಕೋ ಮೋಸರ್ ಬೇರ್ DVDನೇ ಬೇಕು ನಿನಗೆ?”, ಎಂದು ಕೇಳಿದರು. ಆಗ ನನಗೆ ಹೊಳೆಯಿತು, ಇವರಿಗೆ ಮೋಸರ್ ಬೇರ್ ಒಂದು ಭಾರತೀಯ ಕಂಪೆನಿ ಎಂಬುದು ತಿಳಿದಿಲ್ಲ, ಎಂದು.

ಹೌದು, ಮೋಸರ್ ಬೇರ್ ಒಂದು ಭಾರತೀಯ ಯಶೋಗಾಥೆ. ಇದು ಪ್ರಪಂಚದ ಎರಡೆನೇ ಅತಿ ದೊಡ್ಡ CD/DVD ತಯಾರಕ ಸಂಸ್ಥೆ. ಜಗತ್ತಿನ ಮಾರುಕಟ್ಟೆಯಲ್ಲಿ ಶೇ17.5 ರಷ್ಟು ಸಿಂಹಪಾಲು! ದೆಹಲಿ ಮೂಲದ ಈ ಸಂಸ್ಥೆಯ ಎಲ್ಲ ನಾಲ್ಕು ಅತ್ಯಾಧುನಿಕ CD/DVD ತಯಾರಕ ಘಟಕಗಳು ಉತ್ತರ ಪ್ರದೇಶದ ನೋಯ್ಡಾದಲ್ಲಿವೆ.

ತನ್ನ ಅತ್ಯಾಧುನಿಕ ಸಂಶೋಧನೆಗಳಿಂದ ಮೋಸರ್ ಬೇರ್ ಇಂದು ಪ್ರಪಂಚದ ಅತ್ಯುನ್ನತ ಗುಣಮಟ್ಟದ CD/DVDಗಳನ್ನು ಪ್ರಪಂಚದಲ್ಲೇ ಅತಿ ಕಡಿಮೆ ವೆಚ್ಚದಲ್ಲಿ ತಯಾರಿಸುತ್ತದೆ.

ಇಲ್ಲಿನ ತಯಾರಕ ಘಟಕಗಳಿಂದ ಹೊರಬರುವ ‘Made in India’ ಎಂಬ ಫಳಫಳಿಸುವ ಅಚ್ಚು ಹೊತ್ತ CD/DVD ಗಳ ಬಗ್ಗೆ ಇಲ್ಲಿನ ಕಾರ್ಮಿಕರು ಗರ್ವದಿಂದ ಬೀಗುತ್ತಾರೆ.

Click here for the english version of this article: ಇದು ನನ್ನ ಆಂಗ್ಲ ಲೇಖನದ ಕನ್ನಡಾನುವಾದ